രണ്ട് സര്‍ക്കാര്‍ ഹയര്‍സെക്കന്‍ഡറിയിലും ഒരു എയ്ഡഡ് എച്ച്.എസ്.എസ്സിലുമായി വിവിധ ക്ലാസുകളില്‍ പഠിക്കുന്നവര്‍ പതിനായിരം വരും. ഇതില്‍ 60 ശതമാനവും സ്വകാര്യബസ്സുകളെയും ഓട്ടോറിക്ഷ പോലുള്ള കരാര്‍ വാഹനങ്ങളെയുമാണ് ആശ്രയിക്കുന്നത്. സ്വകാര്യ അണ്‍ എയ്ഡഡ്, സി.ബി.എസ്.ഇ. സ്‌കൂളുകളിലെ കുട്ടികള്‍ക്ക് മാത്രമാണ് സ്‌കൂള്‍ ബസ്സുകളിലെ വി.ഐ.പി. യാത്രസൗകര്യമുള്ളത്.
മഞ്ചേരി ഗവ. ഗേള്‍സ് ഹയര്‍ സെക്കന്‍ഡറിയിലെ കുറെ വിദ്യാര്‍ഥികള്‍ സ്‌കൂള്‍ ബസ് സൗകര്യം പ്രയോജനപ്പെടുത്തുന്നുണ്ട്. സര്‍ക്കാര്‍, എയ്ഡഡ് സ്ഥാപനങ്ങളില്‍ കുട്ടികള്‍ക്ക് സൗകര്യമൊരുക്കുന്നതിനായി കുറച്ചൊക്കെ പഴക്കമുള്ള സ്‌കൂള്‍ ബസ്സുകള്‍ സര്‍വ്വീസ് നടത്തുന്നുണ്ടെങ്കിലും മോട്ടോര്‍ വാഹനവകുപ്പിന്റെ സ്പീഡ് ഗവര്‍ണര്‍ നിര്‍ബന്ധവും, ഇന്‍ഷൂറന്‍സ്, ടാക്‌സ് കൂട്ടിയതുമൊക്കെ തിരിച്ചടിയായിരിക്കുകയാണ്. പാവപ്പെട്ട കുട്ടികള്‍ കൂടുതല്‍ പഠിക്കുന്ന സര്‍ക്കാര്‍-എയ്ഡഡ് സ്‌കൂളുകളില്‍ ബസ് ഫീസ് കൂടുതല്‍ പിരിച്ചെടുക്കാനാവാത്തതും പ്രവര്‍ത്തന നഷ്ടമുണ്ടാക്കുന്നു. അണ്‍ എയ്ഡഡ് സ്‌കൂളുകളില്‍ കൂടുതല്‍ ഫീസ് പിരിച്ച് സ്‌കൂള്‍ ബസ് ലാഭത്തിലാക്കുമ്പോള്‍ നഷ്ടംകാരണം സര്‍ക്കാര്‍, എയ്ഡഡ് സ്‌കൂളുകളില്‍ പല സ്‌കൂള്‍ ബസ്സുകളും സര്‍വ്വീസ് നിര്‍ത്തിക്കഴിഞ്ഞു.
