ഇന്നലെ
സാംസ്‌കാരിക ഘോഷയാത്രയോടെ തുടക്കം കുറിച്ച സമ്മേളനത്തിന് സയ്യിദ് ജഹ്ഫര്‍ സ്വാദിഖ് തങ്ങള്‍ പയ്യനാടിന്റെ നേതൃത്വത്തിൽ പതാകകൾ ഉയര്‍ത്തി. ഉദ്ഘാടന സമ്മേളനം സമസ്ത കേരള ജംഇയ്യത്തുല്‍ ഉലമ സെക്രട്ടറി പൊന്മള അബ്ദുല്‍ ഖാദിര്‍ മുസ്‌ലിയാര്‍ ഉദ്ഘാടനം ചെയ്തു. കേരള മുസ് ലിം ജമാഅത്ത് സംസ്ഥാന ഉപാദ്ധ്യക്ഷന്‍ സി മുഹമ്മദ് ഫൈസി മുഖ്യാതിഥിയായി. അബ്ദുര്‍റഹ്‌മാന്‍ അഹ്‌സനി കുട്ടശ്ശേരി അദ്ധ്യക്ഷത വഹിച്ചു. അല്‍ ഫലാഹ് ചെയര്‍മാന്‍ പത്തപ്പിരിയം അബ്ദുര്‍റശീദ് സഖാഫി ഹുബ്ബുര്‍റസൂല്‍ പ്രഭാഷണം നിര്‍വഹിച്ചു. സുന്നി ജംഇയ്യത്തുല്‍ മുഅല്ലിമീന്‍ മലപ്പുറം വെസ്റ്റ് ജില്ലാ പ്രസിഡന്റ് കെ പി എച്ച് തങ്ങള്‍ കാവനൂര്‍, സയ്യിദ് ഹൈദറലി തങ്ങള്‍ എടവണ്ണ പ്രാര്‍ത്ഥനക്ക് നേതൃത്വം നല്‍കി. കെ പി സി സി അംഗം വി സുധാകരന്‍, സി പി എം ജില്ലാ കമ്മിറ്റി അംഗം വി എം ഷൗക്കത്ത്, ആര്‍ ജെ ഡി സംസ്ഥാന ജനറല്‍ സെക്രട്ടറി സ്വബാഹ് പുല്‍പ്പറ്റ, മുസ്‌ലിം ലീഗ് മണ്ഡലം സെക്രട്ടറി എന്‍ പി മുഹമ്മദ്, ഐ എൻ എൽ പ്രതിനിധി ബഷീർ മരത്താണി പ്രസംഗിച്ചു. സുലൈമാന്‍ സഅദി കാരകുന്ന് സ്വാഗതവും ശംസുദ്ധീന്‍ നിസാമി നന്ദിയും പറഞ്ഞു.
ഇന്ന് സ്‌കൂള്‍ അലുംനി മീറ്റ്, പാരന്റ്‌സ് മീറ്റ്, എക്‌സ്‌പോ ഉദ്ഘാടനം, ഇതര സംസ്ഥാന തൊഴിലാളി സംഗമം, ആദര്‍ശ മുഖാമുഖം, ആത്മീയ സമ്മേളനം എന്നിവ നടക്കും. ആദര്‍ശ മുഖാമുഖം സമസ്ത കേന്ദ്ര മുശാവറ അംഗം അലവി സഖാഫി കൊളത്തൂര്‍ ഉദ്ഘാടനം ചെയ്യും. സയ്യിദ് ശിഹാബുദ്ദീന്‍ അല്‍ ഹൈദ്രൂസി കല്ലറക്കല്‍ പ്രാര്‍ത്ഥന നിര്‍വഹിക്കും. മുശാവറ അംഗം അബ്ദുല്‍ അസീസ് സഖാഫി വെള്ളയൂര്‍, അബ്ദുര്‍റശീദ് സഖാഫി ഏലങ്കുളം, അബ്ദുല്‍ വഹാബ് സഖാഫി മമ്പാട്, അബ്ദുസ്സലാം സഖാഫി തുവ്വക്കാട്, ജമാലുദ്ദീന്‍ അഹ്‌സനി മഞ്ഞപ്പറ്റ പ്രസംഗിക്കും. തുടര്‍ന്ന് നടക്കുന്ന ആത്മീയ മജ്‌ലിസിന് എസ് എം എ ജില്ലാ ഫിനാന്‍സ് സെക്രട്ടറി സയ്യിദ് ശിഹാബുദ്ദീന്‍ അല്‍ അഹ്ദല്‍ മുത്തനൂര്‍ നേതൃത്വം നല്‍കും.
